Thursday, April 27, 2006 

إكسر لابنك ضلع يطلعله 24

و انا صغير لما كنت بتخانق مع عيل من عيال الشارع و يضربني كنت اطلع بيتنا اعيط أمي تقول فيه إيه ؟ أقولها فلان ضربني
فطبعا أول رد فعل انها تهبدني قلم و تقولي بس اسكت الراجل ميعيطش
و بعدين تقوم مجرجراني عالشارع و تنادي علي فلانة و تفرجها علي و انا بعيط و تقولها ابنك ضربه و تفضل تتخانق و انا واقف عمال اعيط و زيطة
طيب فلنفترض اني قلتلها مثلا اني مش عايز مامته تضربه ؟ مين يسمع بقي هي كانت ما بتصدق تلاقي خناقة و كان لازم تجرجرني معاها و تفرج الشارع عليا لحكمة .. علشان اتعلم بعد كده ان اللي يضربني اضربه انا كمان مروحش اشتكي و اعيط و زي البنات
بعدين لما فكرت في اللي والدتي عملته معايا دا اكتشفت - بتفكيري المحدود - إنها عودتني علي حاجتين مهمين
أولا : إن اللي يضربني مفكرش أبدا اني اشتكيه لأي سلطة تقدر تجيبلي حقي إنما اخد حقي بإيدي
ثانيا : لو انا مقدرش اخد حقي و الواد نزل فيا ضرب ؟ يبقي اضرب و انا راجل - الكلام ده و انا عندي 6 أو 7 سنين كده - و معيطش
بالتالي كنت بضرب و بعيط و اتبهدل علي إيد امي و افضل مستني لما تجيلي فرصة الإنتقام
طيب هنتقم مثلا من العيال اللي كانو بيهروني ضرب ؟
مانا لو كنت اقدر مكنتش اضربت من الأول
و بالتالي كان دايما الحل اللي قدامي هو تامر اللي ساكن في الشقة اللي تحت
ضعيف و طيب و بيتهته في الكلام
أقوم اتلككله علي أي حاجة و اعجنه ضرب
و اطلع امي تقولي انت كل شوية خناقات و زفت منتاش نازل تلعب في الشارع تاني
و طبعا هما يومين و انزل عادي
بس هو ده كل العقاب لما اضرب واد غلبان و ابهدله
اللي أجمل من كده اني كنت من شباك أوضتي بسمع ام تامر و هي عمالة تعايره بخيبته و تتريق عليه و ممكن اسمعها بتضربه هو كمان عشان بيعيط
طبعا والدتي و ام تامر مكانوش ستات أشرار من بتوع كوكب فودا فودا اللي بيحكي عليه إبليس ده
إنما كانو ستات طيبين جدا و حنينين جدا لكن مقتعين ان دا الصح و انهم كده بيعملو مننا رجالة و مهماش حالات منفردة يعني انما أنا أعتقد انهم نموذج منتشر جدا في مصر
تامر دلوقتي عايش في الإمارات و هو الحقيقة السبب اني افتكرت ذكريات الطفولة المزعجة دي
السنة دي أخته اتجوزت و ابوه مات و هو مجاش خالص و امبارح جيه أخيرا عشان يقف في جنازة والدته
الغريبة اني كنت دايما معتقد ان الأمية هي العامل الأساسي في تصرفات والدتي و والدة تامر دي
إنما اللي استغربتله بجد بقي
إني قريب كنت قاعد عند اختي - و هي متعلمة و بكالوريوس تجارة - و مسمعتش الحوار كله اللي كان في الصالة بينها و بين احمد ابنها و سمعتها بتقوله : أحسن مانت لو راجل كان اللي يضربك تضربه انما تستاهل بقي خليك كده
دا غير اني سمعت ابوه كذا مرة و هو بيتريق عليه و يقوله ( يا خيخة ) و ابوه دا موظف في شركة بترول و برضه عايز ابنه يبقي راجل طبعا
هو بجد دا صح و انا اللي فاهم غلط و لا إيه الحكاية بالظبط ؟

Wednesday, April 26, 2006 

تعليقات حول تفجيرات دهب

اللي عملو كده دول مش بني آدمين و الله -
---------------------------------------------------------------------------------
اليهود هما اللي جُبَنَا بيموتو الناس اللي معاهمش سلاح زي ما بيعملو في العيال بتوع الحِجِرة -
----------------------------------------------------------------------------------
حتي لو فرضنا انهم من مصر .. المصري اللي يبيع بلده بالفلوس ميبقاش مصري -
صح .. لو مصريين يبقو جواسيس -
---------------------------------------------------------------------------------
إسرائيل بعتت تحذير للجالية الإسرائيلية قبل التفجيرات ب 72 ساعة -
الكلام ده أكيد ؟ -
طبعا انا سمعته بنفسي علي قناة الجزيرة -
يا عم يعني هي دي القناة اللي كل كلامها ثقة -
---------------------------------------------------------------------------------
أنا قاعد اتفرج علي الجزيرة اهو -
شفت لما جابو دراع مقطوعة من شوية -
---------------------------------------------------------------------------------
اللي عملو كده مش مسلمين .. دول يهود و عايزين يلزقوها في الإسلام -
إزاي ؟ -
إزاي إيه مش حصلت في بلد إسلامية يا ناصح -
---------------------------------------------------------------------------------
نفس اللي عملناه السنة اللي فاتت قعدنا نقول أمريكان و يهود و في الآخر طلعنا احنا اللي عملناها -
---------------------------------------------------------------------------------
هو كل حاجة تحصل تقولو المسلمين اللي عملوها المسلمين المسلمين خلاص اللي ماشي بشرع ربنا مبقاش عاجب حد -
---------------------------------------------------------------------------------
و الله عمرهم ما هيفلحو ( العالم كله عارف ) ان الإسلام عمره ما أمر بقتل الأبرياء -
---------------------------------------------------------------------------------
عارفين بقي انا عرفت منين انهم مش جماعات إسلامية ؟ -
منين ؟ -
لإنهم لو كانو جماعات كانو عملو عمليات انتحارية مش بقنابل موقتة -
---------------------------------------------------------------------------------
طيب و حتي لو أثبتو ان إسرائيل اللي عملت كده نقدر نعملهم ايه يعني ؟ -
---------------------------------------------------------------------------------
زمان ايام عبد الناصر كان اللي يدينا بالقلم نديله بالشلوت انما دلوقتي و لا نقدر نعمل حاجة -

Tuesday, April 25, 2006 

مناقشة

إمبارح قعدت حوالي ساعة و نص علي شات مصراوي في روم معمولة مخصوص لمناقشة تفجيرات دهب فيها أكتر من 100 بني آدم و بني آدمة، اللي بيتكلموا منهم في موضوع الروم حوالي 10 قضوا أكتر من نص الوقت بيتناقشوا في نقطة واحدة
اللي عمل التفجيرات دي أمريكا و لا إسرائيل ؟

Sunday, April 23, 2006 

خوف

عايز انتحر
مش ضعف مني
و لا هروب
و لا هزيمة و لا انسحاب
و لا رسالة أو تمرد
أو محاولة للانتصار
علي الحياة
لكنه خوف
من لحظة مرعوب منها
لحظة فراقهم
لما يموتوا
و اعيش انا لوحدي حزين
المشكلة
لو هنتحر
مانا هسيبلهم الألم
يمكن يلوموا نفسهم
يمكن يقولوا عاش وحيد
مسمعناهوش، مفهمناهوش
يمكن يحسوا بالندم
طب اعمل ايه
أعيش انا
و اواجه الجاي الحزين
و لا استريح و اسيبلهم
ألم يعيشوا معاه
باقي السنين

Friday, April 21, 2006 

Judgment


You have a right to kill me. You have a right to do that...But
you have no right to judge me
لك الحق في أن تقتلني . لك الحق في أن تفعل ذلك ... و لكن ليس لك الحق في أن تصدر أحكاما عليّ
: علي لسان مارلون براندو في الفيلم الرهيب
(Apacolypse now)

Wednesday, April 19, 2006 

صديق

حسيت بحزن بيعصرني و بيحولني
لشخص تاني مش حابه
قررت أخرجه من قلبي
يبعد عني
قبل ما هو يقتلني
********************
رحت لصحابي و قلتلهم
مخنوق يا بشر
قالولي دا حال البشر
الكل فيه اللي مكفيه
خليك فريش و متتنشنش
بالعربي يعني ماهيش ناقصاك
*********************
قلت الدموع
تخرج و تغسل كل شيء
و ارجع نضيف
كطفل كنته في يوم زمان
نزلت دمعة قالولي عيب
راجل و تبكي ؟
مسحتها
و قلت دانا في عنيا تراب
**********************
كتبت كل اللي في نفسي
خرجت أحزاني و يأسي
علي ورقة علقتها عالحيط
و اللي يزورني بقي يبحلق
يقولي يابني انت يا مبدع
و عنيه تقولي آه يا عبيط
***********************
بصيت شوية حواليا
دورت علي صاحب ليا
ميساعدنيش
و مينفعنيش
يقبلني بس بهمومي
و ان نابو من ألمي شوية
يفضل معايا و ميسيبنيش
ملقيتش غير الحزن صديق

Tuesday, April 18, 2006 

لحظة ملل

في لحظة حسيت بالملل
قررت احطم كل شيء
و أبتدي احيا من جديد
شطبت كل نمر الصحاب
و قطعت الأجندة
و لغيت إيميلي
و خلصت من عناوين بشر
عمري في يوم ما عرفتهم
كلمة لحبيبتي في وشها
سالت دموعها و سبتها
حتي الصديق
اللي مشي معايا الطريق
صرخت فيه
إبعد بقي
سبني يا أخي لوحدي و غور
زهقت منك و منهم
زهقت من نفس الكلام
و الابتسام
و التليفونات
و حتي مواعيد الغرام
أنا عايز ابدأ من جديد
يعني لو مش هعيش سعيد
فحتي أخلص م الملل
**************************
لحظة ملل
فاتت و فات من وقتها
شهور طوال
بحاول ابدأ و مش بلاقي غير فشل
و ف وسط حزني ووحدتي
و غربتي من غير صحاب
من غير حبيب
من غير أمل
أصبحت عايش .. في ملل